x

僱傭兵攻略 – 到底除了金錢,還要準備什麼?

我知大家無乜意欲睇長文,所以我直接講句重點:

「就算有僱傭兵可以請,唔係有錢就肯接。」

好多人講到錢呢個問題,就會覺得有錢直接請幫手防務,甚至策劃行動,唔係好快好直接咩?雖然我睇新聞,不時會見到某國內戰,某方有外國僱傭兵協助等等,但現實西方社會係已經禁止左僱傭兵呢個行業,甚至日內瓦公約同聯合國係有條約,但都有一啲國家係依然有僱傭兵,例如俄羅斯,或中東等等。

不過今次係虛構文章,所以我哋當僱傭兵係合法,假設有一個殖民地,當中嘅民眾忍唔住殖民統治,想請武裝力量行事,係咪有錢就得?

答案係唔得。

錢係基本,而情報係必需

唔得嘅主因係,人哋做生意賺錢為主,佢哋會評估敵方,即係殖民地政府嘅力量,對方實力同國力規模越大,就等同風險越高,當風險同獲利比例不成正比,就自然無公司肯接Job。

但我再退一百步,如果呢個殖民地政府,唔算實力強,有公司認為有機會推翻,有錢有命享,派人傾下合同目標同實務細節,等等,你想講:「唔係我俾咗錢,佢哋就會自動執行咩?」

當然唔係啦,舉例你目標可能係:「綁架某人物」,咁對方就自然可能派十至十二人去處理,但係要明白,一般情況下,大多數僱傭兵唔會係亞裔出身,即係人生路不熟,對方就自然需要大量情報同資料,佢會自行搜集情報,但一定希望僱主提供更多資料同情報,特別係根據目標,而所需要嘅情報內容。

咁我哋放大返到推翻殖民政府,咁自然就需要情報,去計算殖民政府嘅武裝力量、部隊人數、部隊編制、所有指揮人員嘅資料、軍備水平、駐守地點、各基地嘅藍圖同附近設備、主要水電設施、通訊及廣播地點、交通樞紐同機場、各要點地勢、有無外來支援、甚至最好有行動資料參考,可以計算到遇襲後反應、對方支援規模等等、佢哋先會計算到派乜人,用乜軍火,最重要係成本,僱傭兵公司同員工,一定有死傷賠償嘅合同,死傷風險越高,成本就會越高。

所以一般黎講,你想請人之前,就本身應該準備以上資料,喺傾合同嘅時候,對方先容易就你提供嘅情報,去作出回應同估價內容。

後勤就要確保衣食住行

一般人對僱傭兵最大嘅誤會,就係俾左筆錢,佢哋就會一腳踢完成件事,而事實上絕無可能,正如上文你要有提供一定情報同資訊量,人哋先可以理解所需同風險,從而再報價同合作,但仲有一點好重要,就係:「你可以提供幾多後勤?」

我用一種簡化嘅概念,去講後勤:

衣(軍備,彈藥)

食(食物,藥物)

住(住宿,醫療地點)

行(交通工具、進退路線)

僱主應該就呢幾方面,提供到基本支援,因為對方對目標地方,未必有足夠認識同人脈,可以建立到相關嘅補給同地點,用衣做舉例:

或者你無辦法提供軍備,因為有啲合同係會叫僱傭兵公司安排,或者對方有渠道購買,有一定方式送,但你需要有一定方法去接頭,令人哋啲裝備黎到,點運入境,點收藏,點樣確保存放安全,而用呢種方向,食住行都係同一原則,在地人士一定比外來更容易做到。

所以唔好以為,你只係需要俾一筆錢,當對方係外國黎到,仲需要一手一腳做以上兩大方向嘅嘢,我諗就算有公司考慮,但會覺得賺得唔抵而減低認投嘅意欲,依家講緊係反政府嘅事,事成先有合同完成,咁你係對方你會點諗?

其實僱傭兵只係假議題

睇到呢到,其實標題唔係我要講嘅重點,首先要問返大家:「點解你需要請僱傭兵?」

我相信好多人會覺得,因為自己無能力,所以請僱傭兵去達成一啲事,但如果好似我咁講,你本身係要準備咁多嘢,你請人返黎,其實只係因為:「你無足夠人手同專業人士落實目標。」

大家諗下,如果收集到上述嘅情報,同你有能力準備到後勤,其實你差一兩個大項,就可以自己做返,唔洗假手於人,所以對黎講:「有錢請僱傭兵」只係一個假議題,實際係背後你做咗啲乜,去準備你請僱傭兵去做個件事。

甚至要記住今次係虛構文章,我講過文章係建立喺兩點:唔理國際禁止僱傭兵嘅公約,同啲僱傭兵唔考慮對方嘅國力同實力,如果考慮左,其實仲請唔請到呢?

所以我今次想講,首先大家要有能力同組織,做到我上述兩大準備,呢個實務上要準備一小項功夫,如果做唔到,更進一步嘅事就更難。