x

香港歌之一:由《香港地》睇香港地

《香港地》係一首因攝影技術及IT知識而馳名中外嘅(前)歌手陳冠希(簡稱「因希」)於2004年創作嘅歌,因希掛名就係本曲歌手,但呢首膾炙人口嘅歌嘅靈魂其實係香港馳名 Rapper MC仁 及新加坡 Rapper 陳奐仁。

2004年,香港已經發咗七年被主權移交嘅惡夢,當年嘅行騙長官(騙首)係董建華,香港由1998年起,從亞洲金融風暴到中共國厚禮人禍SARS,1997年出世嘅小朋友經歷人生首次被取消嘅畢業典禮(當時冇人會估到原來佢哋嘅人生將會仲有好幾「被取消畢業禮」),呢一年叫做見慣社經江湖香港人剛剛過完香港史上首次口罩歲月,仲有首任騙首終於因連番政經失誤而被Condom腳痛下台,喺呢個百廢待興嘅日子,因希團隊就創作咗《香港地》(當時更加冇人想像到呢首歌有朝一日竟然好大機會變成禁歌)。

以下我會集中分析因希及MC仁嘅歌詞,陳奐仁嗰部分係新加坡人睇香港與本文關係不大,從略。

1)「呢首歌,送俾我既香港
唔理事情有幾困難
環境有幾亂,呢都仲係我屋企
之前係,而家係,將來都係」

Intro 因希就肉麻示愛,2020年時空聽呢挺投機偽人講「愛香港」,教人尷尬癌發作,佢以前愛,當時嘅「而家」愛,當年嘅「將來」都幾肯撚定唔係囉,口裏說愛,身體勁撚誠實嘅偽人多不勝數,撫今追昔真係笑話。

當然今時今日仲係身體力行愛護香港嘅人,已經係受保護動物。

2)「同熱愛這遍土地,大家刻骨銘記,愁或喜,生與死,也是香港地」

2020年講本土主義就似陽光空氣,反蝗、港人利益行先、行有餘力先至幫人全都係民情常識,土生土長生於斯長於斯也會死於斯,用國貨,撐國人,為咗保護香港而身土不二,呢啲已經係政治現實磨礪出嚟嘅常識。

但係2004年係冇本土主義呢回事,潛伏於大部分香港華人文化基因心坎裏嘅大中華情花毒,當年中共國走私賊潮尚未開始,「中國香港人」呢種認賊作父思維先至係香港人主流,但係呢幾句歌詞就好似喺日趨被赤化嘅港人文化基因保住一條根 —— 香港就係香港人嘅土地,無論順逆悲歡,屋只係流離失所,但屋企只得呢一度。

3)「對於呢個地方我同你同一個同感
同一個諗法
我同你同一種人
雖然你有你忙我有我忙佢有佢忙
各有各行業但係用緊同一本黃頁」

呢幾句語帶N關:

同感已經係「相同感受」,同一個同感等於雙重肯定句,有呢份認同香港價值嘅人就會有同一諗法,大家至會係同一種香港人。

香港人各行各業各有各忙,呢度用「黃頁」去象徵各乜各物嘅殊途同歸默契係神來之筆 —— 香港人民族性一直都係外冷內熱,都市人冷漠面孔下卻如黃頁海納百川般含蓄。

4)「經過幾多風暴有啲嘢仍然屹立不倒
太平山頂大帽山頂依舊一樣大霧
新機場唔再新但係呢度多左一個港九車站
唔再用緊既鐘樓仍然喺度

新作風新人事新公司新董事
邊個話事我唔懂事基本上都白紙黑字
經過幾多谷底香港仔仍然係香港仔
見過幾多風浪香港人仍然係香港人」

呢幾句融景入情:太平山大帽山代表香港及九龍新界,嗰陣時嘅港中政經糾紛尚且只係「一樣大霧」,驟看港中之間似乎只係有分歧但尚且有偈傾,新作風新人事新公司新董事當然係講緊香港主權被移交,「邊個話事我唔懂事」正正係香港普遍順民心態政治冇感(或稱之為「港豬」,sort of 啦),當年嘅人仲奉信緊「白紙黑字」法治宗教,政治好深嘅唔關我事,法律寫得「清楚明白」蕭隨曹規就唔驚。

當法治早就係笑話,呢種犬儒(懶係)精英主義只剩得啖笑。

5)「喺得呢個地方出世
就要喺呢個地方度死」

#身土不二 呢種咁悲壯嘅背水一戰歸屬感,十六年前嘅呢首歌輕描淡寫兩句講完 —— 呢度出世呢度死,字面上係講生老病死,其實亦隱含了一旦香港被侵略者進攻,以呢度為歸宿嘅人絕對會以死相搏。

6)「有人會睇到黃金片地
呢度喺一塊福地
有人會睇到唔一樣
樣樣野一敗塗地
有人會識得設身處地
有人會選擇逃避」

一樣米養百樣人,真香港人堅信危中有機,真賣港賊賣權賣責賣屎窟殺雞取卵殘民以自肥,當然亦有為數不少嘅人撤資撤人移民外國做逃兵,你會點揀?「一國兩制」呢塊中共殖民香港遮醜布已經圖窮匕現,閣下冇得再揀雙重效忠㗎啦,冇人再可以上晝幫KFC炸雞,下午幫老麥疊包,一國輾碎兩制,只剩你死我亡。

7)「跌得起,輸得起,搵塊鏡照下自己
香港人至叻,唔使靠人個個靠自已
唔怕攬住一齊死,使乜怕從頭做起
要有碇企,首先要企硬自已」

喺呢個獅子山下體現精神已經畀政權姦到面目全非嘅時代,2004年講「企硬自己」尚守為主,求諸內式默默做好自己本分再講,2020年講「企硬自己」,已經唔到香港人唔去以攻代守,反正大家已經差唔多輸無可輸,所謂攬炒,因希早就介紹過啦,港中敵我矛盾已是國仇家恨,你唔企硬自己,唔駛旨意再有碇企。

《香港地》呢種鼓吹香港人分離主義,煽動香港人顛覆中共國國家安全嘅歌,喺「國家安全」考慮下,曲詞編唱都要浸完豬籠再車裂⋯⋯ 欲加之罪何患無辭呢?中共要先射箭再畫靶,你港獨你老母港獨你冚家都係港獨,中共呢種偽多元多種族實質漢人沙文主義帝國主義蠻夷,香港人喺呢個黃俄帝國蠻鄰面前,你揀跪,跪完佢都係要清洗清算你,你奮起反抗,勝負尚且五十五十未可知,港獨思潮與否唔係你跪定唔跪,而係極權專制中共如何「定性」你,「香港」呢兩個字對中共呢班土著嚟講猶如夏蟲語冰,「香港地」呢三個字係該國「分離主義逆賊」之惡,焉能不除之而後快?