x

走或留,其實都唔係想像咁易

首先,我想直接講出主題,或者應該講呼籲:

「唔好再日日夜夜叫班政治人物走。」

係,我明白大家係因為愛護佢哋,先會勸佢哋走,係出於一個好心,畢竟我哋見過,好多人落入中國政權手中後,都會有唔好嘅下場。

但係如同我以前講過:「我哋依家企係一個矛盾嘅位置,就係一面我哋要覺悟反抗過程會有所犧牲,一面要保住條命長期對抗」或者你會覺得被人拉咗,折磨根本唔會有用,呢個我必須先俾大家理解—

「留有用之身」同「有所覺悟」,其實係並存嘅事,而且無矛盾,不過呢個喺放於一個族群層面去睇,唔係放喺個人層面。

因為唔係每個人都係重耳(晉文公),或者高美尼(首任伊朗最高領袖),一流亡就等於有空間行事以及提供其他非正式援助,甚至人在外依然有號召力同價值俾在外港人支持。

我直接啲講,好多人幻想政治領袖流亡,就等於有機會反撲,但事實上,永遠反撲嘅機會係在於當地,當地人無反抗嘅心,所有政治領袖流亡,係咪代表反撲嘅機會增加?

咁我係咪勸人唔好走?我只會講,每個人走同留,係以自己嘅情況同能力去考慮,無論在外在內,都係一個沉重嘅決定—

在外要承受孤單及環境嘅劇變,克服文化衝突,同時接通國外關注,凝聚在外族群,甚至搵錢延續工作,預防被人暗算同威脅;在內要透過自身嘅存在,表示依家反抗嘅人存在,承受打壓,牢獄之災,被政權不同層面針對引致生活困難,甚至有性命危險。

但上面係只講政治層面,我哋仲有文化同生活層面需要思考,因為所有嘢都可以係政治,但首先要保護嘅,會係文化、語言、文字、歷史、創作、藝術等等……

因為我地本身缺乏:民族、國族、信仰,缺乏三個組成族群嘅元素,就變成我地必須以共同經歷同情感組成共同體,並以呢段時間或歷史,或由開埠至今所建立嘅文化,建立出我地嘅民族、國族、信仰。

所以在內嘅人係令選擇唔走,無法離開,或未來會感受差異打壓嘅人,可以喺本土搵到相關嘅文化、歷史、論述,延續當地在明在暗嘅族群意識;而在外嘅人,係保留住呢段經歷同情感,透過海外嘅族群工作,於世界表明其族群存在。

走有走嘅事,留有留嘅事,當然你講到條命好重要,走真係唔問題,但無論選邊條路,我都希望彼此知有乜要做,幫一下同族就好足夠,但我亦擔心一件事:

網絡世代令交流易咗(如果無審查),但當海外族人同本土族人,因為生活文化同社會環境不一,大家嘅焦點就會有所不同,矛盾同分歧,就係咁樣產生。

特別當族群意識不足下,彼此嘅包容同同理心未必會做到,所以未來當彼此有所交流,大家一定要留意呢點,同記住無論海外同港內,香港人就得我哋。

兩者二如一,一如二。